Selembar Surat Par Mama deng Papa

Mama,,
Mama yang rawat beta selama 9 bulan didalam mama pung poro..
Mama yang siap pertaruhkan nyawa par melahirkan beta..

Beta manangis, mama manyanyi supaya beta tado..
Beta kincing deng bera mama, mama slalu sabar par kas bersih..
Beta bangun manangis tengah malam, mama slalu sabar hadapi beta walaupun mama jua manganto barat..

Tiap hari mama kas makan beta deng mama pung kasih sayang..
Beta minta apa saja mama kasih, yang penting ada..
Beta maraju, mama buju..

Papa,,
Papa yang lindungi beta dari kacil..
Papa yang karja banting tulang cuma par mau kas hidop beta..
Papa yang cari uang sana-sini cuma par kas skolah beta..

Setiap beta minta uang, papa kasih tarus..
Beta minta bali ini itu, papa bali yang penting beta sanang..

Papa deng Mama lakukan samua itu demi beta pung kebahagiaan,
tanpa pikir papa deng mama pung diri sandiri..

Papa deng Mama pung kasih sayang itu sepanjang masa..
Papa deng Mama pung kesabaran itu seng ada batasnya..
Papa deng Mama pung keikhlasan itu seng tertandingi..
Papa deng Mama pung ketegaran itu seng terkira..
Papa deng Mama pung lemah lembut itu kas sajo hati..

Papa deng Mama pung marah itu demi beta pung kebaikan,
walaupun terkadang beta seng tarima karna beta pung keegoisan..
Papa deng Mama pung nasehat itu par kas maju beta..
"JAGA DIRI BAE-BAE" itu Satu kalimat yang slalu menghantui beta pung pikiran,
yang beta akan inga deng jaga akang tarus deng moto "Seng Boleh Langgar Akang"..

Papa, Mama, beta minta maaf..
Beta sadar kalo beta tukang malawang par Papa deng Mama, kapala batu, karas kapala, dan lain-lain..
Setiap beta minta uang dari Papa deng Mama, beta seng pernah pikir kalo Papa deng Mama pung uang ada ka seng..
Karna yang beta tau itu cuma minta deng harus ada..
Tapi, Papa deng Mama seng pernah mau permasalahkan itu..

Papa deng Mama pung jasa beta seng akan pernah bisa balas akang..
Walaupun deng uang sebanyak apapun..

Beta tau kalo Papa deng Mama seng mengharapkan balasan dari beta, karna yang Papa deng Mama lakukan itu samua ikhlas dari hati..
Tapi, setidaknya beta jua mau bikin Papa deng Mama bangga deng beta..
Beta mau Papa deng Mama rasakan kebahagiaan deng beta pung jerih payah, walaupun beta tau itu seng akan pernah cukup par balas samuanya..

Beta kaya bagini, samua karna Papa deng Mama..
Beta paleng sayang Papa deng Mama..
Beta paleng cinta Papa deng Mama..
Beta paleng rindu Papa deng Mama yang jao di Tulehu sana..

Papa, Mama,,
Beta su seng tau mau bilang apa lai..
Beta cuma bisa tulis Selembar Surat ini par Mama deng Papa..
Deng beta hanya bisa berdo'a di tanah rantau,
Semoga Papa deng Mama bae-bae saja, deng apa yang beta, papa deng mama inginkan samua Allah kabulkan akang..
Aamiin..

Share this

Sari